-
-
- Wonnoo ɗoo ko rawaandu e mbeewa ena ngawa .
- Tan fowru tawi ɓe ɗoon , haɓe ngawa .
- Tan ndu joli .
- Ɓe ngoni e awde .
- Fowru nduu wii mbeewa baa :
- « Bottaari , abbo too » !
- Ndu wii kadi rawaandu nduu :
- « Hiraande , abbo too » !
- Yehi haa ɓooyi , rawaandu nduu faami ko fowru wiyata koo .
- Rawaandu noddi mbeewa , ndu wii :
- « A nanii ko fowru haalata koo » ?
- Mbeewa wii :
- « Alaa » .
- Rawaandu wii :
- « Fowru wii , aan ko a bottaari , miin ko mi hiraande .
- Miin noon , so o wiyii ma o hiirtoo mi , o hiirtoto jenngunde » .
- Rawaandu wii :
- « Mbeewa , waɗ feere njahaa wuro .
- So a fotii yettoyaade , mi abbo-maa » .
- Mbeewa fokkiti , woni e yahde .
- Fowru wii :
- « Hiraande , to Bottaari yahata » ?
- Rawaandu wii :
- « Bottaari yahanta ko na nokkoya jaaynge » !
- Fowru wii :
- « Ɗuum wallan .
- Yo o yah » .
- Ɓe ngoni e awde .
- Haa rawaandu anndi mbeewa foti yettoyaade , tan rawaandu ƴeeŋi , ndu wii fowru :
- « Mbeewa yettoyiima wuro .
- Miin ne , mi yehii » .
- Fowru riddi rawaandu …
- Mbeewa yehi .
- Ndeke nde mbeewa yehi ndee , yii jaaɓi ciinyki jaaɓe .
- Mbeewa yejjiti ko dognooɗo fowru .
- Ba woni e murde jaaɓe .
- Ha ba nani gurdu-gurdu , tan ba naati e ngaska mbabba ladde — walla ngirja — ba naati haa heddii hoore ndee .
- Mbeewa futtini gite mum boɗeeje .
- Fowru riddi rawaandu haa rawaandu naati nder wuro .
- Fowru ruttii ene ŋattoo , haa tawi mbeewa nder ngaska , ene futtini gite mum boɗeeje .
- Fowru wii :
- « Ɗum ko mbeewa ne » ?
- Mbeewa wii :
- « Alaa , ko miin Futtan » !
- Fowru wii :
- « Ko woni “Futtan” » ?
- Mbeewa wii :
- « “Futtan” ko ndaarɗo mi maaya , mo ndaarmi maaya » !
- Fowru wii :
- « Walaa hawla walaa quwwata !…
- Muɓɓu gite maa !
- Kori a yiyaani mi dey » ?
- Mbeewa wii :
- « Alaa » .
- Fowru wii :
- « A yiyaani mi , mi yiyaani ma » .
-