Fowru e fayannde teewu e mbaroodi ɓesndi – segmentation forte

 

        • Wonnoo ɗoo ko fowru .
        • Handu yaha ha ndu tawi fayannde teewu ene jooɗii .
        • Ndu huufi fayannde ndee .
        • Ndu hooynii dow , ndu yii naange .
        • Ndu wii naange ngee :
        • « A nyaamataa heen dey » .
        • Ndu wii :
        • « Nyaamanmi fayannde teewu ndee , ko to a yiyataa kam » .
        • Ndu roondii fayannde ndee .
        • Ndu ari e lekki cukkuki .
        • Ndu hooynii dow , ndu yii sereendu naange .
        • Ndu wii :
        • « Ɗoo , hange yiya mi …
        • Ma mi yah ɗo a yiyataa kam » .
        • Ndu ɓenni , ha ndu ari e guumi cukkuki .
        • Ndu rootii fayannde ndee .
        • Ndu hooynii dow , ndu yiyaani naange .
        • Ndu wii :
        • « Ɗoo dey , nge yiyataa kam …
        • Aɗa futtini gital maa tan , ɗo njaami fof , ndewaa e am !
        • Ko a tenkoowo no feewi .
        • A nyaamataa heen dey » !
        • Ndeke mbaroodi ɓesndi ene nder guumi hee .
        • Yontere , yaltaani , nyaamaani .
        • Ene fadi haa ɓikkon mum ngutta , yalta raddoya .
        • Ndu hippiti fayannde ndee tan , haa gite mayru e gite mayri mbaɗdi renku !
        • Ndu wii :
        • « Yumpaany Mbaroodi , miin kay , mi nanno a ɓesnii , ngaddan-maa-mi fayannde teewu » .
        • Mbaroodi wii :
        • « Joƴƴin ɗoon , yah .
        • A jaaraama » !
        • Tan ɓoosaaji mbaroodi njiimi e fayannde ene nyaama kette teewu , ene pijira .
        • Fowru darii ene morsindoo , suusaa haalde , suusaa haɗde .
        • Mbaroodi wii :
        • « Fowru , ko padɗaa » ?
        • Fowru wii :
        • « Hay batte , Yumpaany Mbaroodi , mi yehii » .
        • Fowru ene yaha , ene saɓɓitoo .